0-24samarbeidet

Prosjektet er eit samarbeid mellom Kunnskaps- og integreringsdepartementet, Arbeids- og sosialdepartementet, Barne- og likestillingsdepartementet, Helse- og omsorgsdepartementet og Justis- og beredskapsdepartementet.

I tillegg har etatsdirektørane i Utdanningsdirektoratet, NAV, Bufetat, Helsedirektoratet og IMDi  underteikna ei felles programerklæring og er med i satsinga. Prosjektet varer fra 2015 til 2020.

Fylkesmannen har ei viktig rolle som samordningsorgan. Derfor har også vi eit oppdrag i dette arbeidet på tvers av departementer og direktorat. Vi skal vere pådrivar for at kommunane utviklar eit heilskapleg og samordna tilbod til barn og unge.

Målet er å tilby tjenester som trekk i same retning og at ulike fagområde, på tvers av tenestene, utfyller kvarandre og skapar synergi. Det krev at kommunane har system og haldningar for å sjå og høyre, slik at dei kan gripe tidleg inn og finne gode løysingar saman, samt følge opp barn og unge over tid.

I Møre og Romsdal har vi  organisert oppdraget som ein del av vår satsing "Betre oppvekst". Arbeidet er forankra i embetet si leiargruppe, som og er styringsgruppe. I tillegg er alle avdelingane representert i ei samordningsgruppe som møtast jamnt.