Rauma kommune må behandle planen for Prestsetra hyttefelt i Skorgedalen på nytt
Verknaden av å brøyte vegen til det nye hyttefeltet på vinteren er ikkje kartlagt godt nok. Statsforvaltaren opphevar derfor kommunen sitt vedtak.
Dette innhaldet er meir enn eitt år gammalt. Informasjonen kan derfor vere utdatert.
I desember 2022 vedtok Rauma kommune å legge til rette for eit nytt hyttefelt i Skorgedalen. Reguleringsplanen opnar for å bygge 40 nye hytter like sør for Fossen hyttefelt og Storstølen hyttefelt. Rauma skisenter ligg like i nærleiken.
Veg i konflikt med skiløype
Hyttene i Prestsetra er tiltenkt heilårsveg. Dette inneber at vegen frå turparkeringa fram til hytteområdet må brøytast om vinteren.
- Klagene gjeld at vegen i dag blir preparert og brukt som skiløype. Klagarane skildrar at skiløypa er viktig for hytteeigarane i dei nærliggande hytteområda, og også for Røde Kors, seier fagleiar hjå Statsforvaltaren i Møre og Romsdal, Andreas Welle Rusten.
Interessekonflikten må bli vurdert
Rusten seier planvedtaket no blir oppheva og sendt tilbake til kommunen for ny behandling.
- I planarbeidet er det viktig at kommunen kartlegg og vurderer ulike interesser og kva verknader gjennomføring av planvedtaket kan gje. Dette er ikkje gjort i denne saka ettersom interessekonflikten knytt til vegen er i liten grad omtalt.