Vil du jobbe med berekraftig jordbruk – bli med på laget!

Matproduksjon er meir enn nokon gang på dagsorden, det same gjeld klima og naturmangfald. Vil du arbeide for eit berekraftig jordbruk og auka verdiskaping i jordbruksnæringa? Vi har ledig ei fast stilling på landbruksavdelinga. Arbeidsoppgåvene er varierte, og vil i hovudsak dreie seg om jordkultur, SMIL-ordninga, nydyrking, driveplikt og massehandtering.  

Oppgåver

• ha medansvar for saker om nydyrking – dialog med kommunar, saksbehandling
• rettleie kommunar og behandle saker om massehandtering, og gi uttale om slike tema i plansaker
• samarbeide med kommunane, forskingsmiljø og andre fagmiljø
• forvalte tilskot til spesielle miljøtiltak i jordbruket (SMIL) og tilskot til drenering
• gjere kommunane gode på arbeidet med handheving av driveplikta på jordbruksareala i kommunen, og behandle saker om driveplikt
• delta i arbeid med planprosessar og kome med høyringsinnspel på kommunale planar som omfattar jordbruket
• delta i tverrfaglege utgreiings- og samarbeidsoppgåver med andre statlege regionale etatar, fylkeskommunen, kommunar og næringa

Jorda ein viktig ressurs

Rogaland er eit særs aktivt jordbruksfylke, med stor konkurranse om areala. Dette gir stor merksemd knyta til bruk og vern av areal, også knyta til nydyrking og drift av jordbruksjord. Vi har i oppgåve å finne gode løysingar i balansen mellom nasjonal politikk og lokale interesser, i god dialog med jordbruksnæringa. Vi har eit lovverk å forvalte, men like viktig er det å formidle kvifor vi må ta vare på naturmangfaldet og samstundes sikre bonden grunnlag for matproduksjon. Hos oss får du arbeide med varierte og interessante oppgåver i dialog med kommunar. Vi er om lag 25 tilsette i avdelinga, som alle ønskjer å gjere kvarandre gode.

Ta kontakt

Du må gjerne kontakte landbruksdirektør Geir Skadberg eller ass. landbruksdirektør Anfinn Rosnes.

Vi snakkast!