IPS - Individuell jobbstøtte

Prosjektperioden på tre år no gått ut. Her gir vi ein smakebit på det Nav Stord har fortalt oss om arbeidet sitt.

Arbeidet starta i 2020, og Nav Stord hadde tidleg med seg helseføretak i samarbeidet og utviklinga av prosjektet. Dei har hatt god erfaring med dette samarbeidet.

«Du må ha litt seljar i deg»

Nav Stord ønska å opprette eige team og kompetansemiljø for individuell jobbstøtte (IPS), og her låg også prosjektet som fekk støtte frå tilskotsordninga. Dei hadde tidleg tankar om rekrutteringsprosessen. IPS-rettleiaren må kunne by på seg sjølv og klare å selje inn personar og opprette samarbeid med fleire ulike aktørar. Nav Stord fekk tilsett fire personar som skulle medverka til å utvikle IPS ved Nav-kontoret og på tvers av kommunegrenser.

IPS-rettleiarane var klare for å jobbe aktivt mot arbeidsmarknaden i regionen, men så kom pandemien. Dette hadde sjølvsagt påverknad for utviklingsarbeidet. Dei kunne ikkje lenger stille opp hos ein arbeidsgjevar og etablere kontakt. Dei måtte sjå på nye måtar å kome seg inn på arenaene som var nødvendig for å lukkast med prosjektet. På tross av pandemien klarte dei å hjelpe menneske ut i jobb. Dei såg blant anna auka behov for arbeidskraft i ufaglærte yrke.

«Metodikken verkar!»

Heldigvis fekk Nav Stord også oppleve å drifte prosjektet i meir «vanlege» tider, og dei opplevde stor nytte av prosjektet. Andre driftsår resulterte i at dei fekk over 50 prosent av deltakarane ut i arbeid og nokre i utdanning. Metodikken fungerer – tett og individuell oppfølging gir resultat. Dette gjeld også individuell oppfølging av arbeidsgjevar. Det å få kunnskap om, og relasjon til, både arbeidsmarknaden i regionen og til kandidatane i prosjektet skapar gode resultat. Samstundes er IPS-rettleiaren avhengig av tverrfagleg samarbeid – særleg med helseføretaka. Nav Stord er nøgde med at dei tidleg fekk prosjektet inn i kommuneplanen.

Det kan vere utfordrande å hjelpe menneske med rusliding og psykisk liding ut i jobb. IPS-metodikken fungerer i tråd med føremålsparagrafen i sosialtenestelova; å hjelpe folk til sjølvhjelp og vere medverkande til at menneske får ein jobb dei trivast i og ikkje kjem tilbake til Nav.

Nav Stord ser også moglegheit for å få fleire frå uføretrygd og ut arbeid gjennom å nytte metodikken. Det er mangel på arbeidskraft i regionen, særleg i industrien og i helsesektoren.

Kva skjer vidare?

Prosjektet var godt forankra i Stord kommune og dei har klart å få til ei stilling som IPS-rettleiar vidare til ordinær drift. Det vert berre Stord kommune som held fram arbeidet, og det interkommunale samarbeidet vert avslutta. Mange er blitt kvalifisert til å jobbe i yrke der det trengs folk, og ein har skapt gode samarbeidsrelasjonar med helseføretak og arbeidsgjevarar.

Det har vore spennande å følgje med på arbeidet. Nav Stord har fått eit kompetansemiljø for IPS og nye idear til korleis dei kan nytte IPS-metodikken til å hjelpe dei menneska som treng Nav mest.

Vi ønskjer Nav Stord lukke til med den viktige jobben vidare.